- 569 -

1426. Juni 24. Liegnitz.

Bürgermeister und Rathmannen nehmen gegen einen jährlichen Zins von 40 Mark ein Capital von 520 Mark für Herzog Ludwig Behufs Erwerbung von Strehlen auf.

In gotis namen amen. Wir burgermeyster vnd .. ratmanne der stat Legnicz Conrad Brockotindorff, Hannos Hezeler, Petir Hertil, Petir Rote, Nitsche Hezeler vnd Mertin Polan bekennen offintlich in desim briue allen den die en sehen, horen adir lezen, das wir von gebote vnd befelunge, des hochgebornen ffursten vnd herren, herren Ludwigis herczogin yn Slezien herren czu Legnicz vnd czum Brige vnsers gnadigen liebin herren, vnd auch mit rate, wissen vnd willen der eldisten, der geswornen aller hantwercke vnd der ganczen gemeynen der stat Legnicz recht vnd redelich vorkauffit habin uff die vorgnante stat Legnicz deme erbarn Hannose Foyt vom Goltberge deme eidern die wile her lebit domite czuthuen vnd czulasen vnd noch syme tode synen geerbin vnd rechtin nochkomelingen vnd ap her ane geerbin storbe noch syme tode denen Diteriche vnd Anthonio gebrudern synen fettirn vnd iren geerbin vnd nehsten, vierczig marg geldis yerlichis czinsis czuwedirkauffe vmb vumffhundirth vnd czwenczig marg grosschin yczliche marg vm dreyczehen, dasselbe gelt wir gaben vnd beczaltenn dem vorgenanten vnserm gnadigen herren, domite vnd mit anderm gelde her das land vnd stat Strelen czu em kauffte vnd beczalte. Den selbin czins die vierczig marg geldis globin wir vorgenanten burgermeister vnd .. ratmanne mit allen den die noch vns burgermeyster vnd ratmanne der stat Legnicz gekorin werdin in czukumfftigen czeyten mit gesampter hand keyner mit seyme teyle ledig czuwerden in guten trawen vnd ane argelist deme vorgenanten Hannosen Foyth die weile her lebit vnd noch syme tode synen geerbin vnd rechten nochkomelingen vnd ap her ane geerbin storbe noch syme tode synen fettirn den vorgenanten Diteriche vnd Anthonio gebrudern vnd iren geerbin vnd nehsten, fry vnd ledig allis geschosses, monczegeldis, bate, wache, lozunge vnd dienstis vnd allir andirley beswerungen die uff der stat Legnicz yczund steen vnd auch ernoch irdacht mochten werden vnd auch ane vorbietunge vnd vorsperrunge vnser herren der ffursten vnd irre anewalden vnd mit namen ane hindirniss eyner iglichen personen beyde geystlichen vnd werltlichen, gutlichen vnd liplichen alle yar die weile her nicht wedirgekaufft wirth czu czweien geczeiten des yaris czu Bresslaw in deme howsse das etczwenne Wenczlawen Swarczen gewest ist czugebin vnd czuleystenn, nemlich vff wynachten czwenczig marg vnd uff sente Johannessen tag des tewffers als her geboren warth auch czwenczig marg vnd uff wynachten die nv nest komen anczuhebin vnd also vorbasmer alle yar gleich die obgenanten czinse czugebin vff die selbin czinstage die wile her nicht wedirgekaufft wirth. Geschee abir das den selbin lewten als oben geschrebenn steet der obgenante czins uff die vorbeschrebenn tage wenn sich das geborte nicht gegebin worde noch geleystet, so sal der burgermeyster mit czweyen ratmannen die czu der czeith sitczen an deme rate czuhand obir vierczehen tage noch der irsten manunge, wenn die geschiet vnd sie seyn nicht lengir vorbasmer beyten noch emperen wollin, czu Legnicz uff das rathows geen vnd nymmir von dannen komen, eyn recht gewonlich ynlegir do leystende, also lange bis en der vorsessene vnuorguldene czins gancz vnd gar beczalit wirth vnd vorguldenn; vnd ap sich das ynlegir in die lenge vorczoge, so sol der egenante Hannos Foyt adir syne geerbin adir die den czins noch em habin werdin, des ynlegers nicht schonen vnd mogen vnd sollin vns burgermeystere vnd . . ratmannen, gesworne vnd vngesworne vnd eynen iglichenn vnser mitteburger vnd mit vns wonende in der stat Legnicz vffhaldenn vnd keyner mit syner anczal douon czukomen sunder alle mitgesampter hand czuhalden in stetin, in dorffern, in merckten, in jarmerckten adir awswendig jarmerckten adir sust adir wo adir wenne sie vns adir vnser gut ankomin mogen das mogin, sie angrifen adir anefangen ane rechtis hulffe vnd domite tuen vnd lasen, vorsetczin adir vorkeuffen als ap alle recht dinglichen mite begangen weren. Worden auch Hannos Foyt egenanter adir noch syme tode syne geerbin vnd rechte nochkomelinge vnd ap her ane geerbin storbe noch syme tode Diterich vnd Anthonius syne fettirn egenanten adir ire geerbin vnd nesten des czurate das sie den vorgenanten czins gancz adir eyns teils wolden vorkeuffen so sollin sie en den .. ratmannen der stat Legnicz voranbieten; kewffen sie seyn denn nicht bynnen vier wochin so mogen sie en vorkeuffen weme sie wollin, deme globin wir vorgenanten burgermeyster vnd .. ratmanne mit allen den die noch vns burgermeyster vnd . . ratmanne der stat Legnicz gekorin werden yn czukumfftigen czeiten in guten trawen vnd ane argelist den selbin vorkaufften czins czu globin czugebin vnd czuvorschreybenn gleicherweis als her en vormals gegebin ist vnd in desim geginwortigen briue globit ist vnd vorschrebin. Auch mogen die . . ratmanne der stat Legnicz den czins wedirabekeuffen wenn sie des czurate werden vmb vumffhundirth vnd czwenczig marg gutir gengir vnd gebir Pragisscher grosschin Pollnyscher czal, die sie Hannose Foyte deme vorgenanten adir noch syme tode synen geerbin vnd rechten nochkomelingen vnd ap her ane geerbin storbe noch syme tode Diteriche vnd Anthonio gebrudern synen fettirn auch den vorgenanten adir iren geerbin vnd nesten czu Bresslaw in deme hawsse das etwenne Wenczlawis Swarczen gewest ist wedirgebin vnd beczalin sollin mittenandir, vnschedelich en an deme vorsessenn czinse. Des kauffis vnd aller vorbeschrebenn sachin vnd globde czu eyner festen bestetigunge habin wir desin brieff gegebin dorobir, vorsigilt mit der stat Legnicz yngesigile deme grosten; das ist gescheen czu Legnicz an sente Johannessen tage des tewffers als her geboren warth, noch gotis geburth vierczehenhundirth yar donoch yn deme sechsundczwenczigisten jare.

O. d. St. L. No. 316. Das Siegel verloren.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866